پښتو کتاب : ماشوم نومېښود

 ټولوندوی : مسعود  سرلوڅ  مرادزئ
sarlus1@hotmail.com

Download the whole book here 
(Right click here and choose "Save target as...")
 پوره کتاب خپل کمپيوټر ته ښکته کړۍ

تر هر څه ړومبئ ويلئ شم چې دا نومټولګه څونه نيمګړې ده٬ خو دا يو پیل دئ او هيله ده نور یې په بشپړتوب کې ونډه واخلي .

په نومېښود کې به ښه دا وي چې په پښتو ژبه د ژيو٬ وښو٬ ګلانو٬ بوټو٬ ميوو او داسې نورو نومونو او همدارنګه د چاپيريال بيلاـ بيلو برخو لکه کوڅه٬ چم٬ کلي ٬ بانډه ٬ غر٬ هسک٬ سين٬ ځنګل او ډيرو نورو څخه په پراخه اندازه ګټه واخيستل شي .

همدارنګه د کلتوري ٬ تاريخي پيښو او د هغو د اتلانو نومونه په پام کې ونيول شي.

په نومېښود کې ددې لارې ښېګڼې خورا ډېرې دي. دا ډول نومېښود نه يوازې د چاپيريال  او ټولنې سره زموږ نږدېوالې او خپلوي څرګندوي بلکې زمونږ  د ټاټوبې ٬ هېواد ٬ تاريخ٬ دود او کلتور د پېژنګلوۍ  ښه ښکارندوی هم دی.

 د سا ري پتوګه د انارګل نوم په ايښودلو سره ٬ مونږ نه يوازې په يوه تن نوم ږدو بلکې په داسې نوم سره ٬ مونږ د خپل هېواد  يوه خوږه  مېوه  لکه انار پېژنګلو ته وړاندې کوو او په څنګيزه توګه ورسره ددې مېوې د پيداکېدو سېمې لکه کندهار ٬ تګاو او خوږګياڼي په ګوته کوو. يا ايمل خان  نوم په چا ږدو ٬ په دې  نوم سره مونږ د پرديو- مغلو په وړاندې د خپل يوه اتل د ننګونو او غيرتونو کيسه  او د هغه وخت د پښتنو ځلميانو د سرښندنو يادونه کوو.

په دې ډول نومېښود سره په ريښه کې مونږ خپل ځان ، هيواد او خپل تاريخ بيانوو اوخپله پيژنګلو بشپړوو.

بيله څرګندې اړتيا، د ناپښتو نومونو په اېښودلو سره زمونږ خپله پېژنګلو د نورو منځ کې ورکېږي او د وخت په تېرېدو سره له خپل هېواد، ټولنې او تاريخ څخه پردي کېږو .

که يو څوک په چا غلام ګل نوم ږدي يا مغل يا  داسې نور ، په دې ډول  نومونو سره زمونږ خپله پېژنګلو نه کېږي او په حقيقت کې مونږ د خپل پښتون ملت ، هېواد، تاريخ  او کلتور په ځای ، بل قوم د نورو  تا ريخ او کلتور ستايو.

 البته په دې لړ کې د نړۍ د مېړنيو او وتلو څېرو د نومونو خبره بېله د ه.

همدغه ډول ، ماشوم نومېښود  کې پښتو نومونو ته د پاملرنې په څنګ کې ، د يوې بلې مهمې خبرې يادونه هم پکار ده ، یعنې دا چې مونږ بايد د خپل کلي ، بانډې ، چم ، سړک ، کوڅې او هټۍ نومونه په ملي ژبه پښتو کېږدو ؛ سردړې ( لوحې ) ، تختې ، او اعلانونه بايد په پښتو ولېکل شي ترڅو لوستونکي په دې وپوهيږي چې په کوم هېواد کې اوسيږي او د هېواد ملي ژبه څه ده .

ژبه د يوه ملت هويت څرګندوي او د ملي يووالي په ټينګښت کې لويه برخه اخلي.    
 

که چېرې په نومېښود کې نورو ژبو ته اړتيا پېښيږي له دغو ژبو څخه دې داسې نومونه غوره شي چې ساده او روانه  بڼه لري، د پښتو ليکدود سره اړخ لګوي او په ويلو کې ستونزه نه رامنځ ته کوي لکه غني ، ولي، امان، شېر او نور.

ښه به داوي چې له داسې نومونو سره هم د پښتو روستاړي يوځای شي اويا که اړينه وي د پښتو د کوم بل نوم سره يي تړښته وشي او بيا په نوميښود کې وکارول شي، لکه غني خان، ولي خان  شېرزوی او داسي نور .

کله کله داسي هم شوي چې ځیني پښتو نومونه  په لویلاس عربي شوي لکه څاپئ چې د پښتنو د يوه ستر ټبر نوم دي په صافي ليکل شوئ يا اپريدئ چې د پښتنو د يوه بل ټبر نوم دئ په افريدي لېکل شوئ ، دا ډول تېروتنې او ښويدنې ډېر وخت د ملايانو له خوا شوي دي .

همدارنګه د پښتو ژبې دښمنانو دا هم ويلي چې د پښتو نومونو ايښودل ، ګواکې له شريعت سره سمون نه لري او په  دې ډول يي د پښتو ژبې د غوړېدو اوخپرېدو مخه نېولې ده . په داسې حال کې چې پښتنو له عربو څخه يوازې د اسلام سپېڅلې دين راخېستئ او پښتانه ځان ته خپله ژبه، کلتور، تاريخ هېواد او ملي پېژنګلو لري.

بلخوا څنګه چې پښتو د اندوـ اروپايي ژبو له ختيځې کورنۍ څخه ده ، په عربي ابېڅې د هغې ليکل  ستونزمن او ناشونۍ کار دئ . د سارې پتوګه ګرم چې د ملامت او ګرم چې د تاوده په مانا دئ په يوه شان يي لېکل ، لوستونکئ په شک کې اچوي او خبره پېچلې کوي ، خو که چېرې دا  په لاتين ابېڅې وليکل شي لکه  gram د ملامت په مانا او garm د تاوده په مانا ، لوستونکئ په اسانه پوهېږي چې څه لولي.            

هيله ده چې پښتانه په دې لويه ستونزه په تېره بیا د لېکنې په وخت کې پوهيدلي وي او د خپلې ژبې د مختګ د لارې دا لوی خنډ پخپل لاس ليرې کړي او پښتو بيرته په خپل بنسټ او دود ودروي.

ټولوندوی : مسعود  سرلوڅ  مرادزئ
sarlus1@hotmail.com

Download the whole book here
 پوره کتاب خپل کمپيوټر ته ښکته کړۍ